بالمختصر : بقلم منجي باكير.. الحكومة ما لقاتش فاش تزيد …
رفع سن التقاعد يكون في بلدان تعيش الرفاهة و تعيش عيشا (كريما) و تخلص خلاصا محترما ، موش مع موظفين البريمة فيهم يعمل ثلاثة قهاوي على الخواء و يفطر مشلوش و يتعشى مكرونة كذابي على خاطر فلوسو خذاتهم القروض متاع الياجور و السيمان و نهبهم بنك الإسكان اللي يعوض في ما نهبوه الصحاح ، فلوسو خذاتهم دار الضو و دار الماء و الكار و بقية النهابة ،،، موظف عندو تسعة دم في الدار ثمنطاش في الخدمة ، موظف ما يتحكمش على حق فيزيتة متاع طبيب فضلا عن الدواء ، موظف يفضل يروح موخر باش صغاره ما يحرجوهش ، موظف يدهن ركايبو بالڥيكس في الليل باش الصباح يصبح لاباس و يكمل المشوار اليومي ،،، ترفيع في سن التقاعد و زيد 1 ٪ مساهمة في صناديق خدامتها يضربو في 3 أو 4 شهريات زايدين و البنْيات متاعهم بالمليارات و مصاريفهم ضو و تاليفونات بميات الملاين !!
بالمختصر حكومة ما لقاتش فاش تزيد ،،، زادت في التقاعد !!!